KHOLETŠHE YA TOKA
DITHEOKAKARETŠO TŠA THAROLLO YA DIPHAPANO
DITHEOKAKARETŠO TŠA MOLAO WA THAROLLO YA DIPHAPANO E RULAGANTŠWE KE KAROLO YA SEGAE, TLHAHLO YA TOKA, KHOLETŠHE YA TOKA.
Go na le phapano ye kgolo gare ga go lamola phapanong le go thuša dihlopha gore di kgone go rarolla phapano yekhwi.
Mabapi le tamolo, motho yo a se nago le kamano le phapano o tšea sephetho ka ga phapano gomme sephetho seo se ka gapeletšwa mahlakore ao.
Moo motho yo a se nago kamano phapanong a thuša dihlopha go rarolla phapano re bitša sekhwi poelanyo goba kagišo/tamolo.
Moo dihlopha phapanong di rarollago phapano ya tšona ka ntle le tamolo ya motho wa boraro, sekhwi gantši ke poelo ya tšhepetšo ya therišano gare ga dihlopha tsekhwi.
DITSELA TŠA KAHLOLELO THAROLLONG YA PHAPANO
Motho yoo a tšeago sephetho ka ga phapano ke moahloledi
Bahlankedi ba toka ka go dikgorotsheko ba hwetša maatla a bona a go ahlolela ka go bewa go ya ka dipeelano tša peakanyo ya peomolao.
Go bile go a kgonega gore dihlopha ka go phapano di hlagiše phapano ya tšona gore e ahlolelwe go motho yoo ba kwanago gore e be moahloledi. Ka go bontši bja dikontraka dihlopha tšekhwi di akarertša temana go ya ka dipeelano tšeo di kwanago gore phapano efe le efe ye e ka phulegago gare ga tšona e hlolega go kontraka e tla išwa go moahloledi.
Mohlaledi a ka bolelwa ka leina, goba temana e ka beakanyetša fomula ya go beiwa ga moahloledi, go fa mohlala, ramolao yoo a beilwego ke Lekgotla la Molao.
Kwano ya go hlagiša kahlolelo le ge go le bjalo, ga go nyakege gore e be phatlalatša ka tsela yekhwi. Ka go setšhaba se sengwe, goba lapa, go ka no ba le kwano yeo e ukangwego ya gore phapano e tla tlišwa go hlogo ya setšhaba goba lapa gore go tšewe sephetho ka gobane seo e le setlwaedi seo e hlomilwego ka tshwanelo.
KAHLOLELO KA GO KGOROTSHEKO
Phapano yeo e lekotšwego ke mohlankedi wa toka yo a beilwego ke mmušo.
Dihlopha ga di na le kgetho ya gore mohlankedi wa toka e tlo ba mang.
Tshepedišo yeo e beilwego ke melao ya kgorotsheko, peomolao goba setlwaedi.
Tshepedišo e ka ba ye šoro goba ya kgapeletšo.
Go ka no ba boima go dihlopha go tšwela pele ka ntle le kemelo ya semolao.
Gantši sephetho se swanetše go ya ka mohlala wo o tlemago. Sephetho se tlama dihlopha ka bobedi.
Sephetho se dirišwa ke mohlankedi goba go nyatša ditshepedišo.
Gantši diphetho di ka išwa go kgotlakgolo ka boipiletšo.
Diphetho tša Kgoro ya Fase di ka tšewa ge go dirwa phegišano.
Gantši ke poelo ya go thopaseofoka/go šitega.
Molahlegedi gantši o lefa ditshenyagalelo tšeo di hlotšwego ke tšhomišo ya boramelao.
Ga go ditefelo tša kgorotsheko ka ntle le setempe sa ditseno mo go tshepetšo ya mathomong.
Ela hloko: Kgorotsheko ya dikleime tše nnyane ke learogi ka gore tshepedišo e a gapeletsa gomme dihlopha ga di a dumelelwa go emelwa ke boramelao.
KAHLOLELO
Dihlopha di kgetha moahloledi (molamodi).
Moahloledi e ka no ba setsebi ka go lekala le le angwago.
Dihlopha di na le kgetho ye kgolo malebana le tshepedišo.
Tshepedišo e ka ba ye šoro goba ya kgapeletšo.
Nyakego ya kemelo ya semolao e laolwa ke tshepedišo yeo e kgethilwego.
Sephetho se tlama dihlopha ka bobedi.
Sephetho se swanetše go dirwa taelo ya kgorotsheko gore se šomišege.
Ga go boipiletšo go kgorotsheko - e ka dumela gore go be le boipiletšo go mo/baahloledi yo/ba mo/bangwe.
Sephetho se ka išwa go kgotlakgolo go lekodišišwa.
Ga ntši sekhwi e fo ba poelo ya katlego/tšhitego
Molahlegedi gantši o lefa ditshenyagalelo tše di hlotšwego ke tšhomišo ya boramelao.
Ditefo tša baahloledi di lefša ke dihlopha.
THAROLLO YA PHAPANO KA DIHLOPHA
THERIŠANO
Dihlopha di rarolla phapano ka botšona.
Ga go motho wa boraro yo a thušago go rarolla phapano.
Tshepedišo ka moka e diatleng tša dihlopha.
Lehlakore le lengwe le le lengwe le ka, eupša le ka no se dire, šomiša baeletši ba semolao.
Sephetho sa tharollo se šomišwa bjalo ka kwano (kontraka).
Poelo e laolwa ke maatla le makgoni a dihlopha.
Ga go ditshenyagelo tša semolao, ka ntle le tša moeletši wa seng wa molao ge a dirišitšwe.
POELANYO/KAGIŠO
Dihlopha di rarolla phapano ka noši.
Motho wa boraro o thuša ka tharollo ya phapano.
Tshepedišo e laolwa ke moahloledi ka tšhomišano le dihlopha.
Baeletši ba semolao ba lehlakore le lengwe le le lengwe gantši ga ba amege mo tshepetšong.
Sephetho sa tharollo se šomišwa bjalo ka kwano.
Poelo e a huetšwa eupša ga e tšwe go moahloledi.
Poelo gantši e ka no ba ya maleka katlegong.
Dihlopha di lefa ditshenyegelo tša moahloledi, ge di le gona.
DIKGAKOLLO KA GA POELANYO/KAGIŠO
Sekhwi ke tshepetšo yeo ka go yona motho wa boraro, moahloledi goba molekgotla, a thušago dihlopha go ya phapanong go rarolla phapano. E ka hlalošwa bjalo ka therišano ka thušano.
Gabotse, tlhagišo ya phapano go kahlolelo ke dihlopha e swanetše go ba selo sa boithaupo, eupša peomolao, setlwaedi goba kwano di ka no nyaka gore dihlopha di hlagiše phapo ya tšona go poelanyo.
Gabotse, moahloledi e swanetše go ba motho yo a amogelwago ke dihlopha ka bobedi, yoo a sego a amega ka go sehlopha sefe goba sefe goba go phapano ka tsela efe le efe. Moahloledi o swanetše go šoma ka ntle le thao.
Moahloledi ga a tšee sephetho legatong la dihlopha. Mohola wa moahloledi ke go thuša mahlakore go rarolla phapano ka noši.
Moahloledi o swanetše go phegelela go thuša dihlopha go fihlelela kwano ya tekatekano ka ga phapano ya tšona gore go se be le se tee sa tšona seo se feleletšago se lahlegetšwe. Sekhwi se tloga se le bohlokwa ge dihlopha tšekhwi di tlo ba goba di ka no ba le kamano yeo e tšwelelago, ka gobane pefelo yeo e kwewago ka kakaretšo ke molahlegelwa e dira gore go se kgonagale gore go be le kamano ye botse ye e tšwelelago.
Ka kakaretšo ga go na le peomolao yeo e laolago poelanyo, eupša mehuta ye itšego ya poelanyo e thomile go beakanyetšwa ka boati ke peomolao mohl. Diphapano tša modirong ke Molao wa Dikamano tša Modiro le diphapano tša tikologo gare ga mekgatlo ya mmušo ke Molao wa Taolo ya Tikologo wa 1998. Ge go se na le molao wo mobjalo, tshepetšo le kgetho ya moahloledi di ka diatleng tša dihlopha. Kwano ya go boelanya e ka phethagala ge go hlolega phapano, goba dihlopha di ka no, ka tetelo ya go tsoga ga phapano gare ga tšona ka moragonyana ga fao, tša kwana gore diphapano tše bjalo di tla šongwa ka tsela ya poelanyo.
Kwano ya go hlagiša phapano go poelanyo ga go gapeletšege gore e ngwalwe, eupša kwano ye e ngwadilwego e bohlokwa ka gobane e thuša go hloma bonnete le kwešišego ka ga tshepetšo go bakgathatema ka moka.
Moahloledi o na le boikarabelo go dihlopha go bipa sephiri.
Madimabe ke gore Molao wa Afrika-Borwa ga sešo wa fihlelela baahloledi tshwanelo ya go ba le tokelo ya go gana go utolla mo bohlatseng ka kgorong ya tsheko tsebo yeo e hweditšwego nakong ya poelanyo. Ka go ditshepedišo tša segae tshwanelo ye e fihlelelago dikgokagano ka moka tšeo nepo ya tšona e lego tharollo ya phapano e ka laletšwa gomme dihlopha di ka thekga sekhwi ka go dumela gore dikgokagano ka moka tšeo e lego karolo ya tshepetšo ya poelanyo di na le tshwanelo. Ka go ditshepedišo tša bosenyi phegelelo ye bjalo go tshwanelo e ka se atlege ge moahloledi a biditšwe go tlo fa bohlatse.
Ka kakaretšo, Moahloledi ga a gapeletšwe ke molao gore a be le maithutelo a itšego, eupša go bohlokwa gore moahloledi o swanetše go kwešiša ditheo tšeo di laolago poelanyo le melao ye maleba ya maitshwaro, bjalo ka molao wa go theeletša mahlakore ka mabedi (audi alteren partem).
